ඔවුන් ඔබව බලෙන් වහලෙකු බවට පත් කරන්නේ නැත.
ඔවුන් ඔබම වහලෙකු වන තැනට ඔබව රවට්ටනු ඇත. කම්මැලිකම වීරත්වයක් කර හිමින් සැරේ බිඳෙන් බිඳ ඔබේ නිදහස සොරාගනු ඇත.
විටෙක ඔබ මෙය නොදකී. තවත් විටෙක ඔබ දකී, නමුත් නොසලකා හරී.නමුත් සැමවිටම ඔබ කිසිවක් නොකර ඉඳීවි. ඔවුන් නොවැරදීම සෑම විටකදීම ඔබව යතාර්ථයෙන් පුළුවන් තරම් දුරස් කර තබනු ඇත.
ක්‍රිකට් කණ්ඩායම් සහ දේශපාලකයන්, internet වලි සහ ඒවට හැදෙන memes නිරතුරුවම ඔබේ දෝතටම ගෙන දෙනු ඇත.
ඉන් පසුව ඔවුන් ඔබේ සිතට බිය ඇතුළු කිරීමට කටයුතු කරනු ඇත.
ලෝකයේ නවතම යුධ ගැටුම් සහ අන්තවාදී වර්ගවාදීන් නිසා රට ජාතිය සහ අනිවාර්යෙන්ම ඔබේ ආගම අනතුරේය.
ඔබේ පංචේන්ද්‍රීයම මේ සියළුම ඝෝෂාවන් වලින් පිරී ඉතිරී යනු ඇත. වෙන කිසිවක් දෙස බැලීමට හෝ වෙලාවක් හෝ අවශ්‍යතාවයක් ඇති නොවනු ඇත.
මේ කැළඹිමට අරමුණක් ඇත.
මේ බියට සැලසුමක් ඇත.
ඔබ ඉපදුනු දින සිටම ඔබට රට ජාතිය වෙනුවෙන් සියදිවි නසාගත් පුද්ගලයන් සහ දිවිහිමියෙන් කටයුතු කළ පුද්ගලයින් ගැන තොරතුරු වලින් පුරවන ඔවුන් කිසිවිටෙක,
ඔබේ ජීවිතය සියල්ලටම වඩා වටිනා බව හෝ,
ඔබේ අරමුණ විය යුත්තේ දුටු තැන නොවටිනා ගැටුමකට බිලි වීම නොව බුද්ධිමත්ව සිය රටත් තම හෙටත් රැකගැනීමට කටයුතු කිරීමට ජීවත් වීම,
යැයි නොපවසයි.
ඉතිහාසයේ සිටි එවන් බුද්ධිමත් මිනිසුන් සිය රට බේරාගත් ආකාරය ගැන කතා සඟවා ආවේගශිලිව මැරෙනා සැටි මං පෙන්නන්නම් යැයි කියූ කුඩා මෝඩයන්ට පෙළපොත් වෙන් කරනු ඇත.
ඔවුන් ඔබට නොදැනීම ඔබව මරාගෙන මැරෙන සොල්දාදුවෙක් බවට හරවනු ඇත.මෝඩ මිනිසුන් හට මේ කිසිවක වරදක් නොපෙනෙනු ඇත.
සාමාන්‍ය මිනිසුන් මෙය තේරුම් ගත්තත් මෙය ඉහල පුටුවල සිටින්නන්ගේ හෝ පෙර සිටියවුන්ගෙන් පැවත එන වැරද්දක් යැයි සිතනු ඇත.
"මේ රට පාලනය කරන උන් නම් හෙන මෝඩයින්!"එසේනම් ඔවුන්ගේ පාලනයට යටත් ඔබ මොකෙක්ද?
ඔවුන් සිතාමාතාම මෝඩයින් සේ හැසිරෙනු ඇත.
ටිකෙන් ටික ඔබේ සියළුම දේ සූරාකන තෙක් ඔබ ඔවුන්ට සිනාසෙනු ඇත. ඔවුන් මෝඩයින් යැයි කියනු ඇත.
මේ සංසිද්ධියට සමාන හා ප්‍රතිවිරුද්ධ ක්‍රියාවක් ඔබ සිදු කරනා තුරු කිසිදු දිනෙක මෙය නවතින්නේ නැත.
ජනගහනයෙන් 95%කට මෙය තේරුම් ගැනීමට තරම් බුද්ධියක් හෝ වේලාවක් ඉතුරු නොවනු ඇත.
මනුෂ්‍යත්වයේ හැඟීම් ඒවා ඉනූ තැන් වලටම යලි පාවී ගොස් අප අතරින් අතුරුදන් වී ඇත.
අපගේ මුතුනමිත්තන් කිසි දිනෙක මෙවන් අපහාසයක් ඉවසන්නේ නොමැත. ඔවුන්ට වින කිරීමට පැමිණි උන්ව ගොළු මුහුදේ සැඟවු ඔවුන් ඒ මුහුදේම යාත්‍රා කර ලෝකය ඇල්ලීමට සුදානම් වූහ.
ඒ ලෙයම ඔබ තුල ගලන නමුත් මෙය අපේ කරුමය යැයි සිතීමට තරම් ඔබ නපුංසක වනු ඇත.
එසේත් නොමැති නම් ඔබ ඊට එරෙහිව සිය වචන හසුරුවනු ඇත. මෙයටද comment කරනු ඇත. නිර්නාමික ලෝකයේ පමණක් කරනු ඇත. සැබෑ ජිවිතයේ කිසිවක් නොකරනු ඇත.
ඔබ සියලුදෙනාම එසේ කරනු ඇත.
බියගුළුකම බුද්ධිමත්කම නොවිය යුතුය.
නිර්භීතකම මෝඩකම නොවිය යුතුය.
