ਕੱਤ ਪੂਣੀਆਂ ਗਲੋਟੇ ਲਾਹ ਲੈ
ਨੀ ਜਿੰਨਾ ਚਿਰ ਚੱਲੇ ਚਰਖਾ
ਜਿੰਦੇ ਤੰਦ ਤੂੰ ਸ਼ੌੰਕ ਦੇ ਪਾ ਲੈ
ਨੀ ਜਿੰਨਾ ਚਿਰ ਚੱਲੇ ਚਰਖਾ

ਸੋਚਾਂ ਵਾਲੇ ਤੱਕਲੇ ਦੇ ਵਲ ਕੱਢ ਲੈ
ਹਾਸਿਆਂ ਚੋਂ ਰੋਸਿਆਂ ਦਾ ਹੱਲ ਕੱਢ ਲੈ
ਖੇਸ ਖੁਸ਼ੀਆਂ ਦੇ ਹੱਥੀਂ ਬਣਾ ਲੈ
ਨੀ ਜਿੰਨਾ ਚਿਰ ਚੱਲੇ ਚਰਖਾ
ਜਿੰਦੇ ਤੰਦ ਤੂੰ ਸ਼ੌਂਕ ਦੇ ਪਾ ਲੈ
ਨੀ ਜਿੰਨਾ ਚਿਰ ਚੱਲੇ ਚਰਖਾ

ਮੋਹ ਵਾਲੀ ਮਾਲ੍ਹ ਰੱਖ ਪੂਰੀ ਕਸ ਕੇ
ਦੁੱਖਾਂ ਵਾਲੇ ਪਲ ਕੱਟ ਜਿੰਦੇ ਹੱਸ ਕੇ
ਦਰੀ ਸੁੱਖਾਂ ਦੀ ਬਣਾਕੇ ਤੂੰ ਹੰਢਾ ਲੈ
ਨੀ ਜਿੰਨਾ ਚਿਰ ਚੱਲੇ ਚਰਖਾ
ਜਿੰਦੇ ਤੰਦ ਤੂੰ ਸ਼ੌਕ ਦੇ ਪਾ ਲੈ
ਨੀ ਜਿੰਨਾ ਚਿਰ ਚੱਲੇ ਚਰਖਾ

ਗਮਾਂ ਵਾਲੀ ਗੁੱਝ ਨੂੰ ਹਟਾਲੈ ਬੋਲਣੋਂ
ਮਨ ਦਿਆਂ ਮੁੰਨਿਆਂ ਨੂੰ ਵਰਜ ਡੋਲਣੋਂ
ਚਰਮਖ ਚਿੱਤ ਵਾਲੀ ਚੰਗੀ ਬਣਵਾ ਲੈ
ਨੀ ਜਿੰਨਾ ਚਿਰ ਚੱਲੇ ਚਰਖਾ
ਜਿੰਦੇ ਤੰਦ ਤੂੰ ਮੁਹੱਬਤਾਂ ਦੇ ਪਾ ਲੈ
ਨੀ ਜਿੰਨਾ ਚਿਰ ਚੱਲੇ ਚਰਖਾ

ਦਿਲ ਵਾਲੇ ਛਿੱਕੂ ਵਿੱਚ ਰੱਖ ਖੁਸ਼ੀਆਂ
ਜਿੰਦਗੀ ਤ੍ਰਿੰਝਣ ਬਹਿਕੇ ਕੱਤ ਖੁਸ਼ੀਆਂ
ਫੁੱਲ ਕੱਤਣੀ ਨੂੰ ਰੀਝਾਂ ਵਾਲੇ ਲਾ ਲੈ
ਨੀ ਜਿੰਨਾ ਚਿਰ ਚੱਲੇ ਚਰਖਾ
ਜਿੰਦੇ ਤੰਦ ਤੂੰ ਸ਼ੌਂਕ ਦੇ ਪਾ ਲੈ
ਨੀ ਜਿੰਨਾ ਚਿਰ ਚੱਲੇ ਚਰਖਾ

ਬਿੰਦਰਾ ਕਸਣ ਰੱਖ ਰੂਹ ਵਾਲੀ ਕਸ ਕੇ
ਮਨ ਦਾ ਮਝੇਰੂ ਮਿਲੇ ਮਨਾਂ ਤਾਈਂ ਹੱਸ ਕੇ
ਯਾਦਾਂ ਸੋਹਣੀਆਂ ਦਾ ਸੂਤ ਰੰਗਵਾ ਲੈ
ਨੀ ਜਿੰਨਾ ਚਿਰ ਚੱਲੇ ਚਰਖਾ
ਜਿੰਦੇ ਤੰਦ ਤੂੰ ਸ਼ੌਂਕ ਦੇ ਪਾ ਲੈ
ਨੀ ਜਿੰਨਾ ਚਿਰ ਚੱਲੇ ਚਰਖਾ

(ਕੁਲਵਿੰਦਰ ਸਿੱਧੂ)