ਕਿੰਨੀ ਸੋਚ ਘੁਮੰਡੀ ਹੋਈ,
ਦੋ ਭਾਈਆਂ ਵਿੱਚ ਵੰਡੀ ਹੋਈ

ਮੈਂ-ਮੈਂ, ਤੂੰ-ਤੂੰ ਆਖਣ ਲੱਗੇ
ਇੱਕ-ਦੂਜੇ ਨੂੰ ਆਖਣ ਲੱਗੇ
ਮੈਨੂੰ ਮਾੜਾ ਢੱਗਾ ਮਿਲਿਆ
ਉਹਨੂੰ ਬੌਲਦ ਬੱਗਾ ਮਿਲਿਆ
ਉਹਨੂੰ ਝੋਟੀ ਪੰਜ-ਕਲਿਆਣੀ
ਮੈਨੂੰ ਤੋਕੜ, ਫੰਡਰ, ਕਾਣੀ
ਮੈਨੂੰ ਰੰਬਾ ਖੁੰਢਾ ਦਿੱਤਾ
ਕਹੀ ਦਿੱਤੀ ਉਹਨੂੰ ਚੰਡੀ ਹੋਈ
ਦੋ ਭਾਈਆਂ ਵਿੱਚ ਵੰਡੀ ਹੋਈ

ਚੁੰਭਾ ਵੰਡਿਆ, ਗੰਡ ਵੰਡ ਲਈ
ਤੇ ਚੂਰੇ ਦੀ ਪੰਡ ਵੰਡ ਲਈ
ਪੈਲੀ ਵੰਡ ਲਈ ਪਾਣੀ ਵੰਡਿਆ
ਤੋਰੀਆ ਘਾਣੀ-ਘਾਣੀ ਵੰਡਿਆ
ਅਰਲੀਆਂ ਹਲ ਪੰਜਾਲੀ ਵੰਡੀ
ਕੜਛੀਆਂ ਕੌਲੀ ਥਾਲੀ ਵੰਡੀ
ਭਾਈਆਂ ਦੇ ਵਿੱਚ ਵੰਡ ਹੋ ਗਈ
ਪਰ੍ਹਿਆਂ ਦੇ ਵਿੱਚ ਭੰਡੀ ਹੋਈ
ਦੋ ਭਾਈਆਂ ਵਿੱਚ ਵੰਡੀ ਹੋਈ

ਮਹਿਰੂ ਵੰਡਿਆ , ਗੋਕਾ ਵੰਡਿਆ
ਤੰਗਲੀ ਮੂਸਲ ਟੋਕਾ ਵੰਡਿਆ
ਰੇਜੇ ਖੇਸ ਚਤ੍ਹਹੀਆਂ ਵੰਡ ਲਏ
ਗੰਨਾਂ ਜੌਂ ਮਕੀਈਆਂ ਵੰਡ ਲਏ
ਬੋਲੀ ਬਾਣਾ ਬੋਲ ਵੰਡ ਲਏ
ਤੂੰਬੀ ਮੱਟੀਆਂ ਢੋਲ ਵੰਡ ਲਏ
ਪੁੱਤਾਂ ਹੱਥੀਂ ਆਪ ਹੈ ਖੋਲ੍ਹੀ
ਬਾਬਿਆਂ ਡੋਰ ਸੀ ਗੰਢੀ ਹੋਈ
ਦੋ ਭਾਈਆਂ ਵਿੱਚ ਵੰਡੀ ਹੋਈ

ਚੰਗੀ ਵਹੁਟੀ ਸੌਹਰੇ ਆਈ
ਭਾਈਆਂ ਦੇ ਵਿੱਚ ਵੰਡੀ ਪਾਈ
ਏਦੂੰ ਤਾਂ ਇਹ ਛੜੇ ਚੰਗੇ ਸਨ
ਲੜਦੇ ਨਹੀਂ ਸਨ ਬੜੇ ਚੰਗੇ ਸਨ
ਹੁਣ ਭਾਈਆਂ ਵਿੱਚ ਪਾਟਕ ਪੈ ਗਿਆ
ਵੇਹੜੇ ਦੇ ਵਿੱਚ ਫਾਟਕ ਪੈ ਗਿਆ
ਵੱਖੋ-ਵੱਖਰੇ ਰਸਤੇ ਹੋ ਗਏ
ਵੱਖੋ-ਵੱਖਰੀ ਡੰਡੀ ਹੋਈ
ਭਾਈਆਂ ਦੇ ਵਿੱਚ ਵੰਡੀ ਹੋਈ

ਛੋਟੀਆਂ ਗੱਲਾਂ ਮਸਲੇ ਬਣ ਗਏ
ਮਾਣ ਦੋਵਾਂ ਦੇ ਅਸਲੇ ਬਣ ਗਏ
ਸਾਂਝ-ਭੜੋਲਿਓਂ ਮੁੱਕੇ ਦਾਣੇ
ਵਿਲਕਣ ਲੋਕੀਂ ਭੁੱਖਣ-ਭਾਣੇ
ਲਾਂਬੂ ਨਹੀਂ ਕੋਈ ਮੱਠਾ ਕਰਦਾ
ਹਰ ਇੱਕ ਦੇਖ ਕੇ ਠੱਠਾ ਕਰਦਾ
ਨਾਨਕ ਅਤੇ ਫਰੀਦ ਦੀ ਧਰਤੀ
ਕਿਉਂ ਬਾਰੂਦ ਦੀ ਮੰਡੀ ਹੋਈ
ਭਾਈਆਂ ਦੇ ਵਿੱਚ ਵੰਡੀ ਹੋਈ

ਕਰਮਾਂ ਵਾਲਿਓ, ਧਰਮਾਂ ਵਾਲਿਓ
ਕਰਮ ਕਮਾਓ, ਸ਼ਰਮ ਕਮਾਓ
ਧਰਮ ਪਾਬੰਦੀਆਂ ਲਾਉਂਦਾ ਨਹੀਂ
ਭਾਂਬੜ ਕਦੇ ਮਚਾਉਂਦਾ ਨਹੀਂ
ਇਹ ਨੇ ਸਭ ਚੌਧਰ ਦੇ ਝੇੜੇ
ਪਿੱਟ-ਸਿਆਪਾ ਪਿਆ ਜੋ ਵੇਹੜੇ
ਸਿਰ ਚੁੱਕਣ ਦਾ ਹੀਆ ਨਾ ਕਰਦੀ
ਖ਼ਲਕਤ ਜ਼ੁਲਮ ਦੀ ਫੰਡੀ ਹੋਈ
ਭਾਈਆਂ ਦੇ ਵਿੱਚ ਵੰਡੀ ਹੋਈ

ਦੂਰੀਆਂ ਛੱਡੋ ਆਓ ਨੇੜੇ
ਬਿਨ ਪਲੇਥਣ ਹੋਣ ਨਾ ਪੇੜੇ
ਨਫ਼ਰਤ ਦੇ ਸਿੰਗਾਂ ਨੂੰ ਦਾਗੋ
ਪਿਆਰ ਦੀ ਆਓ ਕੱਢੀਏ ਜਾਗੋ
ਪੰਜਾਬ ਸੋਹਣੇ ਨੂੰ ਖਾਰੇ ਬਹਾਈਏ
ਆਓ ਨੀ ਸਕੀਓ ਦਹੀਂ ਚੜ੍ਹਾਈਏ
ਹੋਵੇ ਪਿੰਡ 'ਚ ਮੁੜ ਚੁੰਝ ਚਰਚਾ
ਸ਼ਾਹਾਂ ਦੀ ਫਿਰ ਝੰਡੀ ਹੋਈ
ਸ਼ਾਹਾਂ ਦੀ ਫਿਰ ਝੰਡੀ ਹੋਈ

(ਗੁਰਵਿੰਦਰ 'ਚਾਕ')