ਇੱਥੇ ਬਾੜੀਆਂ ਤੇ ਬਾਉੜੀਆਂ 'ਚ ਰਾਣੀਆਂ ਦੇ ਕਿੱਸੇ
ਇੱਥੇ ਸੁੱਕ ਗਏ ਜੋ ਖੂਹ ਰੁੱਸੇ ਪਾਣੀਆਂ ਦੇ ਕਿੱਸੇ
ਇੱਥੇ ਰੰਕ ਤੇ ਨਰੇਸ਼ ਕਦੇ ਰਹੇ ਨਾ ਹਮੇਸ਼
ਇੱਥੇ ਚੱਲੀ ਨਹੀਉਂ ਵੱਡੇ ਜਰਵਾਣਿਆ ਦੀ ਪੇਸ਼
ਇੱਥੇ ਬੇਰੀਆਂ, ਭੰਬੋਲਾਂ, ਗੋਲ੍ਹਾਂ, ਜਾਮਣਾਂ, ਲਸੂੜੇ
ਇੱਥੇ ਕੀਹਨੇ-ਕੀਹਨੇ ਸਿੱਖੇ ਵਾਹੁਣੇ ਫ਼ੱਟੀਆਂ 'ਤੇ ਊੜੇ
ਇੱਥੇ ਢਾਬਾਂ ਉੱਤੇ ਆਥਣੇ ਜੇ ਖੇਡਦੇ ਬਟੇਰੇ
ਇੱਥੇ ਮੋਰਾਂ ਦਿਆਂ ਪੁੜਿਆਂ 'ਚ ਰੰਗਾਂ ਦੇ ਬਸੇਰੇ
ਇੱਥੇ ਬਾਘੜੀ ਨੇ ਪਿੰਡ ਵਾਲੀ ਜੂਹ ਦਾ ਸ਼ਿੰਗਾਰ
ਇੱਥੇ ਵੱਸੇ ਕਰਤਾਰ ਰਹੇ ਬਣਿਆ ਵਿਹਾਰ
ਇੱਥੇ ਨਾਥਾਂ, ਦਰਵੇਸ਼ਾਂ, ਜੋਗੀ, ਜਤੀਆਂ ਦੀ ਪੈੜ
ਇੱਥੇ ਮੀਰਾ ਜਈ ਫ਼ਕੀਰਨੀ ਤੇ ਸਤੀਆਂ ਦੀ ਪੈੜ
ਇੱਥੇ ਰੁੰਦੇ ਹੋਏ ਮਾਵਾਂ ਦਿਆਂ ਹਉਕਿਆਂ 'ਚ ਨਾਹਰੇ
ਇੱਥੇ ਚੜ੍ਹਦੀ ਕਲਾ 'ਚ ਬੈਠੇ ਤਵੀਆਂ 'ਤੇ ਪਿਆਰੇ
ਇੱਥੇ ਕਾਮਿਆਂ ਦੇ ਕੱਚੇ ਜਿਹੇ ਢਾਰਿਆਂ ਦੀ ਮਹਿਕ
ਇੱਥੇ ਨੱਕੇ ਹੋਏ ਭੜੋਲੇ ਲਿੱਪੇ ਹਾਰਿਆਂ ਦੀ ਮਹਿਕ
ਇੱਥੇ ਛਮਲੇ, ਮੜਾਸੇ, ਗੁੰਦੇ ਜੁੱਸਿਆਂ ਦੇ ਜੌਹਰ
ਇੱਥੇ ਕੱਚੇ ਜਿਹੇ ਪਹਿਆਂ ਦੀ‌ ਮਹਿਲਾਂ ਜਿੰਨੀ ਟੌਹਰ
ਇੱਥੇ ਨਾੜੂਏ ਨੇ ਨਾਦ ਇੱਥੇ ਕੁੱਖਾਂ ਬ੍ਰਹਿਮੰਡ
ਇੱਥੇ ਕਰ ਨਾ ਕੋਈ ਸਕੇ ਉਹ ਅਦੀਸ ਵੱਲ ਕੰਡ
ਇੱਥੇ ਮੋਚੀਆਂ ਜੁਲਾਹਿਆਂ ਦਾ ਇੱਕੋ ਜਿਆ ਮੜੰਗਾ
ਇੱਥੇ ਖੱਡੀਆਂ 'ਚ ਖ਼ੁਦਾ ਤੇ ਕਠੌਤੀਆਂ 'ਚ ਗੰਗਾ
ਇੱਥੇ ਰੂਹ ਤਬਰੇਜ਼ ਦੀ ਸੀ ਰਹੀ ਪਿੰਡਾ ਮੰਗ
ਇੱਥੇ ਮੁੜ ਕੇ ਅਸਾਂ ਨੂੰ ਫ਼ਿਰ ਦੇਣੇ ਪਏ ਕਰੰਗ
ਇੱਥੇ ਸਿੱਕਾ ਇੱਕੋ ਖ਼ੁਦਾ, ਜੁਦਾ ਪਾਸੇ ਕੋਲੋਂ ਪਾਸਾ
ਇੱਥੇ ਉਹੀ ਬਣੇ ਰਾਜਾ, ਮੰਗੇ ਉਹੀ ਲੈ‌ਕੇ ਕਾਸਾ‌
ਹੁਣ ਦੱਸੋ ਭਲਾ ਲੋਕੋ ਇਹ ਕੀ ਏ ਤਮਾਸ਼ਾ..?
ਇੱਥੇ ਹਰ ਬੰਦਾ ਖੂਹ ਕੋਲ ਮਰਿਆ ਪਿਆਸਾ
ਕੋਈ ਸੋਧੋ ਅਰਦਾਸਾ ਮੇਰੀ ਮੁੱਕੇ ਜਿਗਿਆਸਾ
ਸ਼ਿਵ ਰਾਜ ਕਰ ਹੀਲਾ ਤੂੰ ਹੀ ਦਾਸਾਂ ਦਿਆ ਦਾਸਾ