Korean Drama

ကလေးဘဝတုန်းက ငိုခဲ့ရတဲ့ အမှတ်တရတွေထဲက တစ်ခုဖြစ်တဲ့ {ဖန်ခြေနင်းနဲ့ ယမင်းရွှေစင်} - Glass Slippers (2002)

ငယ်ငယ်တုန်းက ရုပ်မြင်သံကြားမှာ ကြည့်ပြီး တရှုံ့ရှံ့နဲ့ ငိုခဲ့ရတဲ့ ကားလေးတွေထဲမှာ ဒီကားလေးလည်း အပါအဝင်ပေါ့။ ဘယ်လောက်ပဲ အိုဟောင်းနေပါစေ နှစ်ချို့ဝိုင်လိုမျိုး အရသာမပြယ်တဲ့အပြင် ပိုပြီးခံစားလို့ကောင်းတဲ့ ဇာတ်လမ်းမျိုးလေးပါ။

ယနေ့အထိ နာမည်ကြီးနေဆဲဖြစ်တဲ့ ကိုးရီးယားရဲ့ နာမည်ကြီးဝါရင့်သရုပ်ဆောင်တွေပါဝင်ထားတဲ့ ဖန်ခြေနင်းနဲ့ ယမင်းရွှေစင် ဆိုပြီး လူသိများခဲ့တဲ့ ဒီဇာတ်လမ်းတွဲလေးက မျက်လုံးတွေမို့အစ်နေအောင် ငိုရမှာဖြစ်သလို လောင်လည်းလောင်ကြရမယ့် ကားလေးပါ။ ပြန်လည်ကြည့်ရှုချင်သူတွေအတွက် မင်မင်တို့ ချန်နယ်က တင်ဆက်ပေးသွားမှာပဲဖြစ်တာမို့ စောင့်မျှော်အားပေးကြပါဦးနော်။

ဇာတ်လမ်းအညွှန်း ~

ကံဆိုး​​ခြင်းတွေနဲ့ ကံကောင်းခြင်းတွေ ဆိုတာက Tae-Hee နဲ့ Yun-Hee တို့ ညီအစ်မနှစ်ယောက်အတွက်တော့ သိပ်ပြီး မထူးဆန်းတော့တဲ့အရာတွေပါ။ ငယ်စဥ်ဘဝတည်းက မိဘတွေကို ဆုံးရှုံးခဲ့ရသလို အဖိုးဖြစ်သူကိုရှာဖို့ အသွားမှာ နှစ်ယောက်သားကွဲသွားပြီး ညီမဖြစ်သူ Yun-Hee တစ်ယောက် အကျင့်စရိုက်မကောင်းတဲ့ မိသားစုရဲ့ ကားနဲ့တိုက်ခံရပြီး အဲ့ဒီမိသားစုက ရဲစခန်းရောက်မှာဆိုးတဲ့အတွက် သူတို့ရဲ့အိမ်ကိုခေါ်သွားခြင်းခံခဲ့ရပါတယ်။

ကံဆိုးချင်တော့ Yun-Hee ဟာ ကားတိုက်ခံရတဲ့ ဒဏ်ရာကြောင့် အတိတ်မေ့သွားပြီး စိတ်ထားမကောင်းတဲ့ မိသားစုရဲ့ အိမ်မှာ အိမ်ဖော်သာသာပဲနေခဲ့ရပါတယ်။ ဒါပေမဲ့လည်း သူမရဲ့ နူးညံ့လှပတဲ့ နှလုံးသားလေးကြောင့် လူချစ်လူခင်ပေါများလာခဲ့ပါတယ်။

အစ်မဖြစ်သူ Tae-Hee ကတော့ အဖိုးဖြစ်သူရဲ့ စောင့်ရှောက်မှုအောက်မှာ ထူးချွန်ထက်မြက်တဲ့ သူတစ်ယောက်ဖြစ်ခဲ့ပေမဲ့လို့ ညီမလေးကို သတိရစိတ်က သူမကိုအမြဲတမ်း နှိပ်စက်လို့နေပါတယ်။

အဲ့ဒီလိုမျိုး ဘဝအကျိုးပေးကံချင်း ကွာခြားသွားတဲ့ သူတို့ညီအစ်မနှစ်ယောက်ကို ကံကြမ္မာက ဘယ်လိုပြန်ဆုံစည်းပေးသွားမလဲဆိုတာကို တစ်သျှူးလေးဆောင်ပြီး စိတ်ဝင်တစား ကြည့်ရှုရမှာပဲဖြစ်ပါတယ် .....